Que es Interlingua?

In synthese, interlingua es le latino moderne, international e simplificate.

Illo esseva le resultato de un standardisation del vocabulario international del scientia e technologia organisate per un gruppo de linguistas professional post circa 25 annos de recercas sub le nomine de IALA (International Auxiliary Language Association) e coordination final del Dr. Alexander Gode.

Ultra isto, interlingua esseva designate in un maniera que illo es comprehensibile sin studios previe per milliones de parlatores del linguas neolatin (o romanic): espaniol, portugese, francese, italiano, catalano, romaniano, inter alteres. In un grado minor, le anglophonos con plus studios academic pote leger interlingua sin cognoscer lo antea.

A causa de su major regularitate – per exemplo le derivation de vocabulos ex su radices ancestral, le absentia de conjugationes de genere o de verbos irregular – interlingua es multe vices plus facile a apprender que le linguas ethnic. Assi, post poc septimanas, o mesmo dies, un studente pote attinger un nivello de fluentia solo attingibile post annos de dedication in altere linguas.

Interlingua functiona in practica durante plus de 50 annos de experientias in plure contextos, specialmente in Europa. Apprende interlingua e proba lo tu mesme!

Pro explorar ultra, visita le sito official del Union Mundial pro Interlingua.