Mi nomine es Matheus Guimarães Mello, eo es un humanista e iste sito web es un maniera per le qual eo publicara toto lo que eo pensa esser interessante e utile pro altere personas.
Ergo, le paginas del sito es simplemente guidas, itinerarios pro viages in cyberspatio, o al minus, tutorias. Isto es, nulle recommendation es definitive, mesmo si un pagina ha un conclusion eo potera actualisar le informationes o cambiar mi opinion. Memora que qualcunque texto sempre es vivente per plure versiones. Si tu vole navigar in le passato, visita le Archivo de Internet.
Le nomine Technica e Cultura non indica un union inter cosas differente. Eo simplemente vole facer un emphase que le technologia e le cultura es manifestationes ex un singule phenomeno human: le creativitate.
Pro diffunder le cultura de collaboration, le publication de contentos disponibile a compartir e le software libere eo lanceara mi obras sub le licentia Creative Commons Attribution-CompartiEqual 4.0 International. Altere materiales e textos va esser publicate secundo lor licentias proprie mentionate juxta, ma le major parte del imagines e icones usate es in dominio public. Un ulterior forma de contento es le republication de paginas vetule o a pena annunciate, que eo considera de bon qualitate e dunque digne a esser plus cognoscite a un nove publico. Iste typo de republication sera considerate per me como Creative Commons Attribution, excepte si tu es le autor e exige un altere licentia o mesmo le remotion del pagina. In iste caso, per favor contacta me.
Eo utilisa Neocities perque illo valorisa un artisaneria digital. Al fin eo me effortia a producer un obra de valor artistic: paginas in un belle stylo visual, con le codice fonte simple, e in un lingua elegante. Iste sito web usa solmente un modello pro le CSS sin Javascript, durante que tote le codice es scribite manualmente per me in HTML e Markdown. Le typo de litteras utilisate es Atkinson Hyperlegible, optimisate pro personas con basse vision, durante que le typo pro codice fonte es Hack. Pro saper le creditos e plus detalios technic pro esseres human, lege le file humans.txt.
E finalmente, le textos es scribite in interlingua, que eo spera multe personas potera comprender sin studio previe.
Si tu trova nulle cosa interessante pro leger o vider, per favor retorna posteriormente, pois que eo publica lentemente e poco a poco. Seque le nove publicationes in le pagina Novas o in le profilo in neocities.
Sectiones: Technica e Cultura 
Alto 
Initio 
Mappa 
Novas 
Contacto 
Info